Pakacil Banjarbaru » Kisah Bahasa Banjar

Kadap Panjanak

Pakacil — Fri, 19 Jun 2009 23:04:13 +0000

Nang ngarannya liwar handaknya si Kacil wan si Idang, mun kawa sarabanya digawi Kacil tu pang. Dalas hangit, kamana haja disasahnya. Mun wayah karindangan, si Kacil kisang-kisur saurangan kada mangaruan. Handak makan haja asa hanta liur, disuruh kuitan kada igul-igul.

Imuk nang kawan kada kisah lagi, katumpalakannya tu pang. Riang riut rancak mata Imuk mahadangi Kacil bakisah pasal Idang nang sabujurannya kisahnya tabulang bulik haja. Nang ngarannya kawan, Imuk hakun haja jua mamasang talinga mandangarakan. Sabujurannya kacil banar haja nang kada tahu, bilang talinga Imuk rancak manginging.

nang kaya malam arba sumalam …

“dimapa aku ni Muk?”, ujar Kacil mambuka pandir wan Imuk.
“dimapa apanya?”, Imuk manyahuti Kacil.

“pinanya sudah kada katahanan lagi muk ai…”
“nangapa pulang kada tahan. dipacah haja mun kada tahan”

“apanya nang dipacah? bujur-bujur nah muk…”
“ai… bisul nang marantan di batang paha sumalam balum pacah kalu?”

“lain muk ai… mun babaya bisul aku kawa haja maharit, bisul sahang ha pulang”. Kacil manyahuti Imuk asa pina lamah, pinanya bubujuran kadada daya lagi. Baduduan dudukan di ambin rumah Imuk, sambil si Imuk lituk-lituk manggawi dakuan.

“muuk…”, ujar kacil pulang, asa pina lintuk ha kacil mangiyau imuk, kapala tatunduk tangan kariwit-kariwit mangguliming bigi daku.
“nangapa pulang? tuu nah, bigi dakuan jangan dihamburakan lah…”, ujar imuk manyahuti.
“tahu ai aku…”, jar kacil pulang.

“muk… ikam hakun mangawani aku kalu…”, jar kacil manarusakan.
“nang kaya nang masih tu pang, wayah kawa ku kawani haja kalu…”, jar imuk.

“nang sabuting ni talain muk ai. pinanya ikam karas mun pasal nangini, makanya aku batakun badahulu”, kacil sakalinya pina paham jua wan imuk.
“nah hikamam… nangapa pulang? sarana maniniwah lah…”.

“anu muk ai… pinanya si Idang karas hati. maraga tajuramba sumalam haja Idang kada hakun lagi badapat. Ujar Idang pagat haja… Aku handak minta kawani mancari minyak”, jar kacil.
“minyak? minyak nangapa cil?!”, imuk manakuni kacil.

“anuu muk ai, minyak gasan malamahakan hati Idang…”, kacil manyahuti, gimit ha suaranya, gair imuk balaluan sarik. Pas jua ai, imuk kada kawa mandangan pasal nang sabuting ngitu, imuk balaluan manyahuti, “cil, ikam jangan maniniwah lah… ngitu ngarannya basukutu wan iblis. kada bulih cil ai. mun takulidas sasalah sirik ikam. sarana basirik-sirikan gin, bisa babahaya cil ai…”, jar imuk.

“nangapa muk?”, jar kacil batakun pulang.
“busiah ikam kada batamuan wan Idang, maka minyak sudah dipalit ka tangan. pas ikam diluncati kucing ka awak umpamanya. maraga takajut, ikam kibah atawa tangkap kucing nitu, pas ha minyaknya tapalit ka kucing. hakunlah ikam lawan kucing…”, jar imuk baparnum.

“han iya kalu, bamamai sidin…”, jar kacil.
“kadanya bamamai pang. ikam nang maniniwah, kadap panjanak maraga dipagatnya Idang, nang kaya kadada babinian lain ha…”, jar imuk.

“ayu ai mun kaya itu muk ai… sarana baminyak-minyakan”, jar kacil.
“alhamdulillah ngarannya mun kaya itu…”, jar imuk.

“mun mandi pang muk? bulih haja kalu?”
“mandi nangapa pulang?”

“mandi tu paang.. barang ai, mandi bungas kah… nyaman Idang ada jua tatarang upih malihat wan dandaman bila talihati aku muk ai…”, jar kacil manggamati imuk pulang.

Kamumuyakan pinanya imuk wan kacil, sual Idang haja bilang liwar mauknya, ayungannya imuk baucap, “barang haja cil ai, tasarah ikam… babanaran kadap panjanak pinanya, mun ikam handak mandi jua, sabuting haja lagi nang kawa ikam gawi, mandi payu !!!”.

Kada Pati Itih

Pakacil — Mon, 01 Jun 2009 04:17:25 +0000

Kacil wan Imuk dasarnya sabaharian sarantang saruntung, kasitu kamari kujuk-kujuk baduduaan. Kaya urang jua, mambahanu ada rami, bahanu ada juga tapahual. Mun tapahual, kada lain pada Kacil nang rancak pina maraju, tapakalah dapatnya Imuk. Mun disambat bungul kada jua si Kacil nitu, maraganya dasar tapintar Imuk, jauh pada Kacil.

“Hadang ikam Muk ai…”, ujar Kacil, “kugawi tu pang ikam, barang ai, sakali samustawa kadapapa jua…”. Kacil mamikirakan dimapa jalannya handak manggawi Imuk. Napang, tuhuk sudah tapakalah dapatnya Imuk.

Pas banar, damini hari sanayan. Mun di almanak, pas 1 Juni pulang. Kacil asaan ingat nangapa jar guru di sakulahan bahari. Tuhuk Kacil mambungkari buku, nang pina kada karuan tampuh lagi. Ada nang talipat-lipat, baluman sual andakannya nang tahambur ka situ kamari. Di buncu mana haja kah si Kacil bahari mangajal.

“Pas… kada bataha lagi hudah, Imuk kada harapan ingat sual nang sabuting nangini…”, ujar Kacil bagimit, bapandir saurangan, pas banar nang kaya urang paning lalat.

Badadas Kacil bukah kaluar matan kamar, turun matan rumah mauulur sapida mutur. Kada saapa kada kalihatan lagi matan rumah. Ngalih ai, mun dasarnya sudah lanjar. Kada kawa ditangati sual bajalanan. Kada saapa, sampai jua Kacil di wadah Imuk.

“Muuuk.. imuuuk…”, Kacil bakuciak mangiyau Imuk.
“Nangapa? sarana bakuciak… aku mandangar haja, wan sunging talinga mandangar tahu lah..”, jar Imuk manyahuti Kacil, “kanapa garang?”, ujarnya pulang.

“kada ai, ikam tahulah Muk, hari ini hari nangapa?”, Kacil mamulai.
“nyata haja tau, wahini sanayan, mun isuknya arba.”, Imuk manyahuti.
“lain nangitu, ikam tahu kada hari ini tanggal barapa?”
“nangapa garang? tuhh.. itihi bahimat almanak nang batikap di tawing. Kada baisian kah dirumah?”
“nah, kada tau kalu ikam…”, Kacil pina marasa manang sudah.
“bah lah ai, tanggal 1 cil ai, bulan Juni”, Imuk sasar mauk sudah.
“mamparingati nangapa kita Muk, mun tanggal 1 juni ini?”
“nah, hikamam… nangapa garang cil, pabila Idang hakun lawan ikam. Saminggu gin kada sawat, bapiragah satahun pulang !” Imuk manyahuti.
“han tia… kada tahu kalu. Makanya Muk ai. Bujur haja ikam jar urang tapintar. Sakalinya pasal nang sutil sabuting ni haja kada tahu”, Kacil mulai bapiragah.

Imuk badiam, kikira mahahar ampah pandiran Kacil. Imuk bamula paham, Kacil handak maangsul limbah rancak tapakalah. Pas banar tatangguhan Imuk.

“kaya ini Muk ai, wahini tanggal 1 Juni. Lain sual si Idang. Ujar palajaran sajarah bahari, wahini tu Hari Lahir Pancasila. Ingat kada ikam?” ujar Kacil manyambung.
“hi ih lah… babanaran..”, jar Imuk, “kada kaingatan sahama-hama aku Cil ai…”.
“han… tia… jadi Muk lah…”, baluman tuntung Kacil baucap, disambung Imuk langsung.
“hadang Cil, hadang… aku umpat batakun satumat..” jar Imuk mamagat pandiran Kacil.

Mandangar Imuk batakun, asa himung Kacil. Asa dapatnya tu pang sudah si Imuk.

“aku batarima kasih banar ikam ingatakan. tapi aku handak jua batakun, ada nang aku kada pati paham lagi, barakat ikam ingatakan jua pang…” jar Imuk mamulai.
“nangapa tadih?” jar Kacil himung.
“ikam tahu kalu Cil, burung Garuda… nang ada parisainya nangitu. Ikam tahu lah pada burung nangitu diharamakan?” Imuk batakun.
“hah, nangapanya diharamakan urang. Burung nangitu lain wan babi. Mun haram kadanya jadi lambang pang. Lain jua wan fesbuk, ada haja nang maharamakan. Ikam jangan maniniwah Muk ai…”, Kacil mulai kada kawa manyandang angsulan Imuk.

Imuk lihum maitihi Kacil sasar bapusang, ditarusakannya pulang…
“mun nang ngarannya burung Cil ai, kadada nang diranakakan. samuaan diharamakan . hintalunya. takuni ha wan kuitan burung barataan, musti maharami hintalunya. kataraannya haja nang balain-lain”, jar Imuk. Mandam si Kacil mandangar, tapakalah.

“sabuting pulang..”, jar Imuk. “ikam tahu lah andakannya rantai di burung garuda nitu?”.
“tahu ai ! dibawah, subalah kanan !” Kacil manyahuti kakalahan.
“sabutingnya pang? dimana andakannya?”
“kanapa pulang dua? maka sabuting haja? nang lain nitu bintang, banih-kapas, puhun baringin, wan kapala hadangan. rantai sabuting haja !”
“naah.. rantai nitu dua buting Cil ai… sabutingnya di gulu…”
“kanapa digulu?!” Kacil tatap kada manarima.
“rantai nang digulu nitu pacang manggantung parisai-nya. wih ha parisainya batikap di dada kaya almanak di tawing”, ujar Imuk manyahuti, “lawan, aku kadada manyambat gambar rantai di parisai, nang kutakunakan andakan rantai… ngalih ai mun ikam kada pati itih…” jar Imuk pulang.

Mandam maginnya si Kacil. Kada babunyi sabatik-batik bulik. Gas sapida mutur dihanggusnya, parak bahantup pulang lawan tihang listrik kaya nang sudah.

Lawas Maunting

Pakacil — Sun, 11 Jan 2009 16:00:00 +0000

Nangini mambuliki kisah sapida mutur si Kacil parahatan hanyar. Panambayan Kacil balajar manungggang kuda japang. Sapida mutur nang maulah si Idang tajungkang bahari. Sabujurannya kisahnya pina mambari supan. Kacil ngarannya, mambahanu kada tapi tahu dimuha, ada haja kalakuan sakira kada supan nang sabujurannya maulah mambari muar.

Kacil sabujurannya harat banar basapida BMX. Mun parkara maninjak sapida, handak kamana haja dilawaninya. Mun sapida mutur, baluman suah dusur-dusur, tapaksa Kacil balajar.

Tugul banar Kacil balajar, kada siang kada malam. Nang kada sawat takisahakan haratan Kacil balajar pas kamarian, mana hari pina maram pulang. Nang ngarannya handak bisa, tatap haja Kacil bakaras balajar. Nang kuitan sudah jua manangati.

“kaina haja gin bauntung batuah’ai. Harinya pina maram, kalu pina balaluan hujan, busiah kanapa-kanapa kaina…” ujar nang uma.

“kadapapa Ma’ai.. mun ulun kada tugul balajar, lambat jua bisa. ngalih mun pian handak minta antarakan ka pasar,” ujar Kacil manyahuti.

“han kalu.. kakanakan wahini… bilang ada haja sasahutannya lawan nang tuha. kada tapi kawa dipadahi. nang tuha sabatik, inya dua batik bapandir…”, jar nang uma pulang.

Babaya tuntung nang uma baungap mamadahi, kada sing suaraan Kacil mendusur turun ka higa rumah, maulur sapida mutur, pacang balajar.

Brummmm…. masin sapida mutur babunyi, Kacil sudah lancar haja mun urusan maninjak mahidupi masin. Kada saapa, mandusur am Kacil, bahanu pina lihum saurangan, mamikirakan pacang mambawai si Idang bajalanan.

Bulang-bulik Kacil, kasana kamari kada sing muyakan. Nang malihat haja lagi nang muyak. Bubuhan kakanakan lain nang dudukan di warung Kai Su’it hinggan malihatakan haja. “ngalih ai mun anak urang sugih bakahandak”, jar buhannya bapandiran. Kasa saapa tuntung saikung baucap…

brakkkk… !!! sing nyaringan tadangar, kada saapa ada pulang tadangar, “akaaiiii…..!!!”

“hau… ajin ai…”, jar buhan nang duduk di warung Kai Su’it tadi. Kada mahadang nangapa-ngapa lagi, barabakan buhannya bukahan matan warung ka luar malihati.

Pas banar parak wan warung Kai Su’it ada tihang listrik, nang matan kayu ulin nitu nah. Nang maulah buhannya takajut, sapida mutur Kacil pina rabah, wan ada si Kacil taduduk maurut batis.

“haw.. kanapa ikam?” ujar saikung manakuni Kacil, “maranjah tihang listrik kah? harinya marimis pang, tagalingsir maraga licak kah ikam?” ujarnya pulang.

Mandangar ada nang batakun, lawan kada saikung dua haja urang nang bukah manyasah wan malihat inya taduduk, Kacil badadas badiri. Tangan kanan ka pinggang, bakacak pinggang. Nang jadi sual, tangan kiri si Kacil manapak-napak tihang listrik, lalu baucap..

“kada kaya itu pang. Pinanya tihang nih lawas banar sudah, tihang tuha. Sakalinya kuat banar haja lagi, taguyang gin kada. Ulun lawas sudah maunting, hanyar tadi kaingatan handak mancubai, dasar harat PLN sakalinya mamilih tihang …”

Maraga Kahandakan Bakoyo

Pakacil — Sun, 30 Nov 2008 01:43:28 +0000

Haji Ipul, abahnya Kacil, tamasuk urang nang rajinan banar. Mun kada rajinan, nyata banar sidin kada taurusi kabun sidin nang palaluasnya di kampung nitu. Mambahanu, parahatan hauran nang lain, sawat haja sidin manjanguki kabun. Kada nang kaya urang lain, wayah-wayah kada tapi kaubar maurusi kabun.

Lamun dipipikirakan, pinanya Haji Ipul nangini limpat rajinan, bapataknya haja lagi nang baluman lagi sidin. Sakali pang Haji Ipul tapakalah banar dapat nang bini, maraga katuhukan balantak di kabun. Sawat haja sidin marasai mamaian bini.

Pungkalanya kada lain pada habar maling nang katuju manyuuk kabun urang di kampung. Wayahini pulang am, tiwadak bamula musim. Haji Ipul kikira ada haja baisian tiwadak bangsa 3 – 4 burungan.

Limbah mandangar kabun Haji Kaspul, tiwadaknya lingis diputiki maling, Haji Ipul bamula bapikir. Pacangan kada bagaguringan tu pang jar sidin mahaga kabun. Kada kurang-kurang akal jua pang nang ngaran Haji Ipul nangini. Wayah bubuhan kakanakan kampung dudukan di warung Kai Su’id, didatangi sidin.

“U… kakanak.. buhan ikam nangapa digawi saban malam? Ba dum haja kah?” Haji Ipul batakun.

“Kada ai Pa Haji ai, bahanu bapandiran wara, bahanu bagantungan jua pang. Mun sual pinggirannya kadada pang, Lillahi ta’ala nah Pa Haji ai, mun ba dum buhan kami kada suah babuatan…” ujar saikung manyahui bapanjang-panjang.

“Iiihh…. mintu ah. Buhan ikam hakun lah, salajur bagadang salajur maambil upah manjaga akan kabunku. Kaina buhan ikam dudukan di lampau. Mun sual makanan wan minuman ada haja…” Haji Ipul manawari.

Karisikan bubuhan kakanakan kampung mamandirakan nang disambat Haji Ipul. Ayungannya bubuhan hakun.

Singkat caritra, malam nitu bubuhan kakanakan bakumpulan di lampau di tangah Kabun Haji Ipul, urang balima barataan. Kada saapa, datang Haji Ipul mambawa tarmus wan jintingan. Sidin mambawa kupi wan teh, salajur wadainya.

“pas banar pian datang Pa Haji ai…” ujar saikung baucap.

“bah lah ai, buhan ikam ni… aku tahu aja. Suah anum jua bahari. Liwar kada nyamannya mun bamamalaman ari ngini muntung rasa karing…” Haji Ipul manyahuti.

“kada nang kaya itu pang Pa Haji ai… bubuhan kami nangini datang balima… nang dibawa dum lawan papan catur. mun ba dum jalas sudah urangnya baampat, mun bacatur nyata kada kawa saurangan. urang nang pagat lambaran haja lagi nang main catur manyaurangan… mun pian kada hauran, kikira hakun ai kalu mangawani Udin Sintak bacatur satumat…” ujar saikung manakuni Haji Ipul

“bah.. pas banar, aku sing lawasan sudah kada suah bacatur. Lakasi Din.. susun sini… ikam mun sing pur bidak haja kulawani, sudahnya pur nang lain…” Ujar Haji Ipul pulang satangah baagak wan mahalabiu.

“bilang liwar pian lah… nangapa lagi nang uhu pada bidak? nangapanya nang di pur...” Ujar Udin Sintak manyahuti.

Kada lawas, hinip badudua, Haji Ipul wan Udin Sintak bacatur. Kakawanannya nang lain bilang daur ba dum, bahanu ada guplah, tarancak dum jua pang. Nang daur lamun ada nang manyaratus, pacang hibak tu pang muha wan gapitan tatapasan.

Haji Ipul liwar hinipnya, kada manyangka sidin pada Udin Sintak harat bacatur. Haji Ipul kada paham lagi pada di gawi Udin Sintak, sakira lawas bacatur, inya kulir jua mun kadada kawan, manyaurangan bahinipan. Udin maraganya kada tapi bisa ba dum, aur gapit tarus.

Parahatan handa ma’amar mantri Udin, takalipik Haji Ipul mandangar urang bang di masigit. “hauu… subuh kah sudah sakalinya. Ayuha Din-ai, kaina kita sambung pulang” ujar Haji Ipul, badadas sidin bulik handak ka masigit.

Bulik matan masigit, bamula Haji Ipul marasa awak pina ringkut, kada tapi nyaman.

“Uuu umanya… aku pina kada nyaman awak nah, asa ringkut. Handak bakoyo haja pinanya nah…” ujar sidin lawan nang bini.

“napa jar pian? handak bakoyo? Uuu abahnya…. ingat wan umur, sarana baagak. Siapa pulang nang handak diagaki. Mun batuhaan handak baagak, nangapa ngalih maharagu si Kacil anak pian nitu, kalupina manurun ka anak kalakuan. Mun umur sudah pina sanja nangini abahnya ai… sarana maniniwah, Tuhan batata haja. Jauhakan bala mun pian handak baagak pulang. Mun bacaramin tu nah abahnya ai.. ditiring pang jambul, mun sakira kada kawa malarak lagi, sasadangnya ai baingat…”, ujar bini Haji Ipul mamadahi nang laki.

Hinip Haji Ipul mandangar nang bini basuara, jauh pang lagi matan siput di pas, kawa haja sidin manyahuti, “kada umanya Kacil ai.. aku kada handak bakoyo, tapi handak mamakai koyo…”

“han.. napa pulang? mun dipadahi urang kisah handak baliung pulang. Hintadi bapadah handak bakoyo, wahini handak mamakai koyo pulang…”, nang bini manyambung.

“Uuu… umanya, aku nih handak mamakai koyo, sakira nyaman awak. Nang ditikapakan ka awak tu nah, nang barikit wan panas-panasnya.. di tipi nitu koyo kalu ngarannya… cuba am ikam mun ka pasar tukarakan kaina…” ujar Haji Ipul ayungannya mamadahi nang bini.

“Iiiihh… titikapan awak kah…”

Kaingatan Kuitan Tarus

Pakacil — Mon, 13 Oct 2008 09:12:23 +0000

Ada nang ingatlah wan Julak Ibud, nang mati diigut buhaya. Ada jua pang sudah kisahnya. Nangini pulang kisah anaknya Julak Ibud, Ijun, sapupu dua kali si Kacil. Subujuranya ngaran Ijun nitu Joni, tapi nang kada di kampung kada di kuta sama haja pada katuju baisian ngalar galar atawa ngaran kiyauan, makanya am Joni dikiau Ijun.

Kisah nangini kajadiannya pas hari raya sumalam.

Kada nang kaya hari raya nang masih, Ijun ada haja baisian kuitan nang langkap, abah wan uma, pas hari raya sumalam Julak Ibud, kuitan Ijun sudah kadada lagi. Haji Ipul, kuitannya Kacil nang paranahnya mamarina Ijun mahatiakan juga sual nang sabuting nangini.

Marga asa maras nangitulah, Haji Ipul wan bini sidin mambawai Ijun wan umanya bahari raya di rumah sidin haja. Kacil gin himung jua batamuan wan sapupu dua kali nang lawas kada tatamu limbah Ijun maumpati kuitan baangkut ka gunung marga takutan diigut buhaya sumalam.

2 hari mahadapi hari raya, Ijun wan umanya sudah bamalam di rumah Haji Ipul. Kacil pina rami banar bajalanan limbah saur wan parak buka. Kacil mambawai Ijun bajalanan kasana kamari mamakai sapida mutur, tapi kada lagi Kacil manyuruh Ijun bapingkut nang kaya inya manyuruh si Idang bapingkut sumalam nang maulah inya kada di hirani si Idang.

Kada saapa hari raya sudah. Pas malam urang batakbiran, Ijun wan Kacil umpat jua ka masigit wan batakbiran kuliling kampung. Nang kuitan Haji Ipul, baganaan haja di masigit mangganii buhan panitia fithrah. Isuknya pas hari raya urang sumbahyangan Id di lapangan bal subalah kampung.

Limbah tuntung sumbahyangan, Ijun wan Kacil, tamasuk jua kuitan buhannya bulikan ka rumah Kacil.

Nang kaya nang masih jua sabah hari raya, baampunan barataan. Nang kada kawa dikaramputakan nitu mata umanya Ijun nang pina habang, sidin kaingatan wan Julak Ibud, panambayannya hari raya nang kadada Julak Ibud, abahnya Ijun.

“ayuha Umanya Ijun ai…”, ujar umanya Kacil, “basabar haja. Baik kita batatap gasan makanan hari raya nangini tampulu takumpulan.” Ujar umanya Kacil pulang mambawai umanya Ijun bahauran, supaya kada tapi kaganangan. Ijun mandam haja pang malihat nang uma kaganangan abahnya.

Kada lawas buhan Haji Ipul sakaluargaan makanan, tamasuk Ijun nang mahantup banar lawan garih batanak. Kacil bapaluh liir, bahanu muntung hiut-hiut kapanasan wan kanyamanan. Tuntung makanan, mulai pina rami buhan nang tuha manggayaakan kalakuan Kacil wan Ijun parahatan makan. Mambahanu mangalakak tatawaan barataan. Sakalinya Ijun hanya nang kada umpat tatawa, inya tadiam saurangan kada umpat bapandir wan tatawaan.

“hau… kanapa ikam Juan? kakanyangan banar kah?” ujar Kacil manakuni Ijun.
“.. kada cil’ai… mun babaya sapiring ha lagi, muat haja parutku…” ujar Ijun manyahuti Kacil

Kuitan Kacil wan umanya Ijun mandangarakan haja napa jar buhannya badua bapandiran.

“limbahitu pang kanapa ikam pina mandam haja kada basuara…” Ujar Kacil pulang manakuni Ijun.

“kaini cil ai, aku tu saban limbah makan, balaluan kaingatan wan kuitan……” ujar Ijun manyahuti kacil.

“ayuja Jun ai. Ikhlas haja, sidin nyaman sudah wayahini…” ujar kacil mamagat pandiran Ijun.
“kada kaya itu pang cil ai…”

“bujuran Jun ‘ai, bauntung arwah abah ikam baisian anak nang mangganang sidin limbah makan. mudahan ikam ingat tarus mandu’a akan sidin, supaya sidin nyaman…” ujar Haji Ipul pulang manambahi.

Umanya Ijun mandam mandangar Ijun bapandir. Balukuk sidin balaluan dipusuti umanya Kacil.

“Kada kaya itu pang Julak ai..”, ujar Ijun manyahuti Haji Ipul.

“limbahitu pang nangapa?” ujar abahnya Kacil manakuni.

“Gigi ulun ni balubang lawan pina jarang. Makanya am ulun limbah makan rancak banar kasulitan, makanya am ulun haur mancarii kuitan haja imbah makan…” ujar Ijun manyahuti.

“nah hikamam… jadi nang ikam pandirakan nangini sual ….” ujar Haji Ipul. Baluman tuntung sidin bapandir Ijun sudah manyahuti., “inggih… Julak ai, ulun kaingatan kuitan gigi…”.

Haji Ipul wan bini sidin tadiam mandangar sasahutan Ijun, handak tatawa ngalih, handak kada katia abut manahani tatawa. Umanya Ijun nang kada kawa manahani banyu mata, tunggal dikitan banyu mata sidin barabakan. Kacil nang kata tahan.

Malabuk balukuk Ijun di tapaknya Kacil, “makanya am… Jun ai, mun bapandir tu batata. Bangaga dahulu hanyar baucap…” ujar Kacil.

Lamah Lintuhut

Pakacil — Mon, 26 May 2008 04:08:40 +0000

Minggu sumalam,. Amang Iram mambawai anak bini sidin bajalanan ka Banjar. Sakali samustawa jar sidin bajalanan batiga baranak ka banua urang. Kada batuhukan bapatak di kampung jar sidin. nang nyata gasan tambang taksi sidin tulakan kada maunai duit urang, apalagi nang ngarannya duit kantur. Mun sidin bakabun saurang, dimapa handak ada duit kantur kaya urang.

“Sakali-sakali kita tulakan umanya Idang-ai”, ujar Amang Iram wan Acil Imah. Acil Imah gin hakun haja, wih ha lagi hujungan nang gasan hidup takakat jua, nyata sidin kada hakun. Pas tangah hari mambarangat, tulakan sidin manyambang taksi ampah ka Banjar di higa timbuk.

Amang Iram basalawar hirang wan babaju sasirangan, tatap kada lapas kupiah jangang sidin. Acil Imah babaju kurung wan kakamban biru, sualnya kaina nang kaya lagu banjar jar sidin mun bakakamban habang. Si Idang, anak sidin nitu, sabujurannya handak jua nang kaya kakanakan wayah ini, nang babaju pina kidat tagal Amang Iram nang manyariki.

Sabujuannya, Amang Iram kadanya kada suah pang ka Banjar, tapi nang ka mol nang hanyar nitu, Amang Iram hanyar nang panambayan tulakan nangini pang. Ujar habar nang sidin dangar, mol nangitu pangganalnya di banjar. Batutukan nangapa haja ada. Jujualan nang kaya tatanaman di kabun sidin ada jua. Marga mandangar nangini jua am sabujurannya Amang Iram handak tulakan. Salajur manyalajur. Salajur balilihat banua urang wan anak bini, salajur jua umpat batakun, kawa kadanya umpat maandak jujualan ujar sidin.

Sual sidin nang handak umpat maandak jualan nangini kaina ada haja kisahnya baasa. Wayahini kisah sidin tulak wan bulik haja hulu.

Amang Iram sampai sudah di banjar. Bakuliling banjar sidin, ayungannya limbah maghrib sampai jua di mol nang dituju tadi. Tauling kapala sidin malihat urang nang kababanyakan di situ. “Nang kaya ini sakalinya pasar nang hanyar di kuta”, ujar sidin wan nang bini, “sadang kita bacari masigid umanya Idang ai”, jar Amang Iram pulang. Tuhuk sidin batakun, dapat jua sidin di langgar nang dituju. Imbah ba maghrib, bajalanan sidin pulang, batuhuk.

Tuhuk sudah Amang Iram bakuliling. Kaya urang jua, nang mambawa tutukaran bakantung palastik nang ada cap ngaran tukunya. Kada tarasa lagi pada jam sapuluh malam.

“Sadang sudah kita bulikan”, jar Amang Iram wan nang bini.

“Bujur abahnya ai, dimapa amun kita mancubai taksi nang jar urang nyaman nitu?”, ujar Acil Imah.

“kada laranglah tambangnya?”, jar Amang Iram.

“ayuja abahnya ai, sakali nang kaya urang, asal suah tarasai. Kalupina kapuhunan”, jar nang bini.

“inggih bah ai, kada papa jua sakali mancubai”, jar Idang manambahiakan.

Nang ngarannya bini wan anak bakahandak, ayungannya Amang Iram hakun jua bulik ba taksi. Biar ha larang tambangnya jar sidin, mahimungi bini wan anak napa ganal pahalanya ujar sidin. wan wayah ada ha duitnya, lain hal mun dipaksa’akan wan pacang baagak wara.

Mayambang ai sidin batiga baranak ka taksi sedan, jar urang tu taksi argu. Kada paham jua nangapa artinya argu nitu. Babuat sidin barataan ka dalam, Amang Iram duduk di muka di higa supir, bini wan anak sidin dudukan di balakang. Karinyuman lihum badudua tulus kahandak. Imbah dipadahakan wadah bulik, balalu ai taksi bajalan.

Kikira marga kauyuhan wan kanyamanan di taksi, Amang Iram batiga baranak taguring, kada marasa lagi di jalan. Kada tahu lagi sidin pada jalan sing kadapan, marga lampu jalan dimatii urang, baiirit satrum jar.

Kanapakah imbah lawas guring, Amang Iram ta’ilan. Takajut banar sidin babaya marasa mutur taksi nang dinaiki bajalan gimit. Nang maulah sidin kada karuan rasa, supirnya kadada di higa, muturnya bajalan gimit banar. Pucat Amang Iram, kada kawa lagi manggarak nang bini wan anak. Sabak zikir sidin babacaan.

Mana kadap higa mahiga, anak bini masih nyaman banar taguring, supir kadada, tapi mutur tatap bajalan, takamih haja lagi sidin nang balum. Parahatan liwar katakutanannya Amang Iram, sidin malihat kapala mancungul di jandila mutur higa sidin, takibar banar sumangat sidin, kada kawa lagi babacaan, muntung bangangaan, muha pucat kada badarah lagi.

“kanapa pian?” ujar kapala nang mancungul nitu batakun wan sidin.

“si..si…siapa i…i…i…ikam?”, jar sidin, “kita barilaan lah, kami kada mangganggu ikam wan anak cucu ikam. lakasi ha bulik”, jar Amang Iram pulang.

“bapandir nang apa pian Pa Haji?”, batakun pulang wan Amang Iram. Amang Iram kada kawa manyahuti lagi, katakutanan, kada kawa jua marasa himung di sangka urang haji wayah bakupiah jangang. Sakalinya urang nangitu baucap pulang, “ulun ni minta tulungi pian tunjulakan mutur jua Pa Haji ai, mutur muguk Pa Haji ai, ulun kada ingat maiisi minyak, wan minyak larang banar wayah ini. Matan tadi ulun kada purun handak mambangunakan pian guring, tapaksa ulun manunjul saurangan. Ulun kada tahan lagi kalapahan manunjul. Kada saapa lagi ada haja pom binsin. Tulungi Pa Haji lah”.

Mandangar nitu, rasa lamah lintuhut Amang Iram, lain pada nang disangka sakalinya.

Manukari Kaduanya

Pakacil — Sun, 18 May 2008 16:00:00 +0000

Wayah malihat kababanyakan iklan hape di tipi, Kacil handak jua manukar hape. Nang kaya biasanya ai inya, batagih wan Haji Ipul nang kuitan. “Nyaman pian kada ngalih mun macarii ulun bah ai”, ujar Kacil. “kada salang kujuk-kujuk kasana kamari mancarii. Lawan mun batalipun nitu, bapandir gimit gin mangiyau kadangaran haja, sarana halulung halulung bakuciak”, jar Kacil pulang manggamati nang kuitan.

Kalalawasanya kada tahan jua Haji Ipul di gasak Kacil tarus. Kasana kamari diumpatinya, kisang kisur batagih dihiga abahnya. Sabujurannya sidin muyak, mun kada tapi parlu jua, sarana gin ujar sidin. “larang lah nak haraganya?” jar nang kuitan, manakuni jua sidin ayungannya.

“mun larang tu kada pang bah ai, inya bamacam-macam mudilnya?” jar Kacil manyahuti.

“Ikam handaknya nang kaya apa garang. Sarana balarang-laranglah mun baya gasan bapandiran”.

“kada bah ai”, Kacil mulai himung mandangar nang kuitan sudah lamah, “nang ulun handak nitu talabih sadikit pada sajuta, kurang sadikit pada dua juta”.

“hau… mun bajuta-juta nitu larang ngarannya nak ai. Nang tamurah lagi ada ai kalu. Pakulih haja kikira 200 ribuan”.

“ngitu ngarannya seken bah ai. barang nang sudah di pakai urang. bahanu nang rusak dibaiki urang”, Kacil balaluan pina maraju di suruh nang kuitan mancari nang murah haja. Masam muhanya.

Parak saminggu Kacil pina maraju, kada tapi mahirani wan kuitan. Han, pas banar kalakuan kakanakan wayah ini, nang banyak pina sarik wan kuitan mun kada diturutakan kahandak.

Bahari-hari Kacil mamikirakan, dimapa jalannya supaya nang kuitan mau manukarakan nang dikahandaki. Kada dapat jua Kacil jalannya, napang nang kuitan pina karas jua.

“amun kaya itu tarus, bisa balajuran sidin kada mau sidin manukarakan ikam”, jar Imuk mamadahi Kacil, wayah Kacil bailang wadah Imuk, bakisahan. “Makanya am, jangan tapi ungah, wan karancakan batatagih wadah kuitan” jar Imuk pulang.

“bujur jua jar Ikam tu muk ai. Kalu pina sidin maraju. Maka mun maraju tuha ni ngalih banar tatambanya” ujar Kacil manyahuti, “mun kaya itu, hakun haja gin aku manukar nang lain”.

Ayungannya bapadah jua Kacil wan kuitan pada hakun haja manukar nang di bawah sajuta, tapi kada mau jua nang dua ratus ribuan, mun nang haraga 700-800 ribuan mau haja. Haji Ipul gin ayungannya mau jua, mandangar Kacil hakun manukar nang kada larang. Himung banar Kacil. Imbah dijulungi kuitan duitnya, balaluan Kacil bukah kada ingat burit lagi, ka rumah Imuk. Minta ganiakan wan Imuk tulak manukar hape.

Isuknya, tulakan Kacil wan Imuk bakuliling pasar mancari urang nang bajualan hape. Kada saapa tadapat jua ai buhannya di wadah nang pina banyak barangnya. Imuk sudah jua manyambat wan Kacil, inya kada mau umpat bapandir, kaina kalu pina Kacil mangira manangati nangapa nang handak ditukar Kacil. Kacil hakun haja inya saurangan nang bapandir.

Limbah tuhuk mamilih hape, dapat jua nang dikatujuinya. Picik-picik si Kacil mancubai. “Ulun manukar nangini haja Mang ai”, jar Kacil asa nahap sudah wan pilihan.

“nah, bajadian ai kita mun kaya itu”, jar nang bajualan, “kujual lah, saadanya, barilaan kita” jar sidin pulang limbah Kacil manahuri haraga hape, 725 ribu. “kartunya am nangapa ikam handak?” jar sidin pulang manakuni kacil

“nang bagusnya napa Mang?” jar Kacil manakuni pulang, kisah paham.

“kaya ini haja sudah. Kikira sinyal nang kuat di wadah ikam nitu sinyal nangapa? nyaman nangitu haja kartunya. Kadada gunanya pulang ikam manukar hape mun kadada sinyalnya jua”, jar sidin mamadahi Kacil.

“bujur jua jar pian, tapi ulun kada tau Mang ai. Mun kada ngalih kaya ini haja sudah… ulun manukar hape nangini lawan sinyal-sinyal-nya haja salajur, kada bataha tasalah lagi kaina, iya kalu Mang?”

Mandam nang bajualan mandangar nangapa ujar si Kacil.

Handak Bapintar

Pakacil — Sun, 18 May 2008 00:09:25 +0000

Matan halus, Kacil tamasuk kakanakan nang tahancap bapandir. Wayah-wayah sampai, wayah-wayah pina pilat bapandir. Kakanakan ngarannya. Haji Ipul wan bini sidin katuju banar menyuapi Kacil iwak rabuk walut. Jar urang bahari nitu supaya bapintar, sidin kada tahu pang lagi pada walut nitu liwar banyaknya protein mun jar urang wayahini.

Lamun Kacil halus bapandir, bahanu bubuhan nang madangarakan tatawaan. Sapalih marasa manggarigit, kikira sapalih marasa mambari muar, mun kakanakan bapandir nang kaya urang tuha. Kacil ngarannya, kada tapi tahu-tahu. Sabujurannya Kacil halus dasar pintar, tapi wayah balumba di sungai bahari, kacil pas batajun langsung manyalam, tapi kalalajuan. Kapala kacil tahangkup tunggul. Kapala rasa naning panambaian, limbah itu Kacil rasa kadap, kada saapa siup urangnya. Untung nang kuitan ada jua di batang, badadas manajuni wan manulungi Kacil.

Kikira marga tahangkup tunggul nitu Kacil wayah katuha ngini bahanu pina luput, untungnya kada sawat pagat lambaran pang. Bahari limbah tahangkup tunggul nitu Kacil dibawa batatamba kampung haja.

Sumalam, Kacil nang sudah sakulah SMA nitu, tangah hari limbah bulik sakulah, pina maungut saurangan duduk di atang. Kuitan managur kada dihirani jua. Lain pada biasanya mun handak batatagih. Kacil dasar kakanakan nang canggih pang, tapi nang artinya cangkal batatagih. Maungut ngini lain ciri Kacil mun handak batatagih. Mun ada kahandak, Kacil bilang bagisang hidung wan kuitan haja lagi nang balum digawinya.

Imbah si Imuk ampun caritra, hanyar mangarti bubuhan nang lain. Sakalinya wayah sakulah baisukan tadi Kacil digusari nang guru. Tiwas pang, Kacil jua nang kada manggawi PR. Wayah ditakuni Imuk kanapa kacil kada manggawi PR, jar Kacil, "inya PR-nya kada dipariksa pagururan jua Muk'ai, kaya nang masih tu pang".

Hinip ai Imuk mandangar apa jar Kacil, kada kawa dipadahi lagi. Pas jua ai hari nitu, Kacil takana sial, PR sakalinya dipariksa paguruan. Wayah kada kawa malihatakan gawian nang sudah kawajiban nitu, Kacil di satrap guru di hadapan kakawanan. Supan banar inya.

"Amun kaya ini, aku nyata banar disambati urang bungul", jar Kacil dalam hati, sambil taungut di atang, "aku kada handak tarus kaya ini".

Rupanya Kacil nang maungut matan bulik sakulah nitu tuhuk mamikirakan kaya apa caranya supaya kada bubungulan lagi. Inya ingat haja pang pada bahari suah tatumbuk tunggul di kapala. Limbah lawas maungut, Kacil lihum saurangan, "dapatku sudah jalannya supaya kada bungul lagi", jar Kacil saurangan.

Badadas Kacil bukah ka rumah Imuk kawannya, nang kada jauh jua.

"Muk… Muk… lakasi ganii aku ka pasar…", Kacil bakuciak. Babaya Imuk mandangar, badadas jua Imuk manyambangi Kacil ka muhara lawang. "Kanapa Cil ikam kuciak-kuciak?"

"lakasi ganii aku ka pasar!"

"handak baapa badadas ka pasar? apa nang diharit? ada nang garingkah?"

"kada kaya itu pang Muk ai. Kadada nang garing. Aku handak bapintar banar ai. Aku tahu sudah jalannya"

Himung wan bingung Imuk mandangar nang disambat Kacil. "napa maksud Ikam Cil? handak bapintar? handak manukar buku sagan balajarkah ikam?" ujar Imuk manakuni Kacil.

"uii… kada Muk ai, aku tahu jalan supaya pintar. Jalan nang hancap", jar Kacil marasa harat dapat panamuan.

"nangapa garang? dimapa jalannya?", Imuk magin bingung wan sapalihan curiga.

"makanya aku handak ka pasar. Aku handak manukar Tulak Angin nang banyak, bapintar tu aku kaina. Makin banyak maminum, makin pintar aku Muk ai. Cuba ikam lihati di tipi nitu iklannya", jar Kacil manyahuti Imuk.

Kada kawa Imuk manyahuti Kacil, kikira tatampiling haja lagi nang balum.

Bujur tapi luput

Pakacil — Fri, 09 May 2008 18:13:14 +0000

Ini sual Amang Iram pulang, wan bini sidin Acil Imah. Malihat kalakuan Kacil wan Idang, Amang Iram kaganangan wayah sidin anum bahari. Wayah sidin masih bagawi di Kantur Camat, jadi tukang barasihiakan kantur wan halaman-halamannya. Sidin wayah itu hanyar lapas matan kuitan, handak mancubai hidup saurangan jar.

Di kantur camat nitu jualah Amang Iram tatamu wan Acil Idah, mun jar urang walanda itu ngarannya love at first sight, alias karindangan matan siritan mata nang panambayan.

Bahari, parahatan Amang Iram asik basasapu mambarasihi kantur camat, kada singhaja sidin talihat banbinian nang pina taanum matan sidin mambawaakan banyu gasan urang. Asa kada suah malihat jar sidin dalam hati. Sakalinya babinian nangitu pagawai hanyar di kantur camat nitu jua. Halimah ngarannya. Mun dikiau Alim liwar kada cucuknya, makanya'am di kiyau Imah. Ngaran Iram nangini gin ada sajarahnya. Ngaran sabujurannya Abdul Karim bin Karim Abdullah. Asal muasal di kiyau Karim, tapi mambahanu tasalah, nang di kiyau Karim nang anak, nang manyahuhi Karim nang tuha. Makanya'am ngaran kiyauan Amang Iram nang asalnya Karim diubah sadikit, jadi Iram.

Matan panambayan malihat Imah nitu, Iram pina asa kada kakaruan saurangan. Lihum manyaurangan, mun ditakuni urang lagi kanapa, pina kasusupanan saurangan. Nang ngarannya bagawi sakantur, rakcak'ai Iram wan Imah tatamu. Kada usah basusuluh lagi manyuruh nang tuha, bisa haja basusuluh saurangan.

Mulai ai bapatuhan ai badudua. Asa pina nyaman kada nang bacakut lamun tatamu. Bapandiran asa pina rasuk haja. Kalalawasannya, Iram marasa pas sudah, iya sudah ni, jar Iram. Kada nang lain lagi.

Iram bulik ka kampung satumat, bapadah lawan kuitan minta kawinakan. Bujur harus tu pang Iram bapadah lawan kuitan,"babiniannya balum tahu pang" jar Iram, "kaina haja, pas pian badudua badatang haja hanya inya tahu, nyaman himung kada sakira", jar Iram pulang. Hiih 'ai nang kuitan, marasa nang anak cucuk wan kadada nang pacang mangalihakan.

Batatap 'ai buhan kuitan wan kulawarga Iram handak badatang.

Singkat caritra, pas buhan kulawarga Iram datangan, sudah siap jua bubuhan bibinannya. Bapandiran batuhaan ai sudah. Abah wan umanya Imah handak batakun bujur-bujur hulu wan Imah.

"nak, bujurkan ikam katuju wan Iram?" ujar nang kuitan.

"inggih, ulun katujuai…" jar Imah.

"ikam tahu ai kalu, pada wayahini Iram wan kuitannya badatang handak maminta ikam pacang si Iram. Kaya apa nak? hakun kah ikam?"

"ulun hakun ai Bah ai, tapi…", Imah manyahui tapi tapagat kada kawa basuara lagi.

"tapi kanapa nak?"

"ujar guru mangaji ulun, mun babinian nitu kada bulih kawin lawan kawan lalakian sakantur. Haram jatuhnya jar sidin bah'ai.." jar Imah manyahuti tatakunan nang kuitan.

"haw… mandangar dimana ikam?" jar nang kuitan takajut.

"guru mangaji ulun bah ai..".

"nah… hikamam, manyalah saku nih guru mangaji ikam nitu, kada suah abah mandangar nang kaya ini nah. Amun bubujuran manyalah, ampih haja ikam mangaji wan sidin. Sidin kita undurakan jua matan kampung..", jar abahnya Imah takajut wan kasasarikan, "wahini jua kucarii sidin, nang masih ada haja pang dilanggar urangnya !"

Habang hirang muha abahnya Imah kasasarikan wan guru mangaji Imah. Bapadah satumat wan kuitan Iram, pada ada nang handak ditakunankan ka wadah guru mangaji di langgar, wan sidin kisahakan jua apa nang jar Imah tadi. Kuitan Iram paham, kada tasinggung. Badadas abahnya Imah turun, manyingsing ka tapih wan sandal kada tapakai lagi, tapi dijinting sidin haja.

Pas banar dilanggar sidin badapat wan guru mangaji nang dicarii.

"uuu.. guru.. hauran kah? ada nang handak ditakunakan nah..!" ujar Abahnya Imah kada ingat lagi baucap salam.

".. haw kanapa Julak? pina bagagasakan banar…"

"bujurankah pian maharamakan babinian kada bulih kawin lawan kawan lalakian sakantur?!?"

"matan mana pian mandangar?"

"Imah nang bakisah. Jar Imah pian nang maharamakan! bujurankah? jangan manyalaya pian malajari urang mangaji lah…!"

Lihum sidin mandangar Abahnya Imah pina manyanyarik, di bawai sidin dudukan, hanyar dibukaakan sidin kisahnya.

"kaya ini Julak ai…", jar sidin mambuka kisah, "nang jar Imah nitu bujur haja, tapi luput jua"

"haw… jangan bapanggal-panggal pian! mun bujur tu, bujur haja, mun luput, luput ai sudah!"

"kaya ini maksud ulun. Babinian nitu, bulih kawin lawan saikung lalakian haja, dua ikung laki haja nang taimbai kada bulih, wih ha saikung sudah sarak atawa maninggal, hanya bulih kawin baasa. Nah, dua ikung haja kada bulih, haram, apalagi am mun sawat kawin lawan kawan lalakian sakantur….an, maginnya ai haram" ujar sidin.

"uuuu… mintukah.." jar Abahnya Imah, "mandai haja pang Imah bujur tapi luput…."

Tatukar nang kada langkap

Pakacil — Thu, 08 May 2008 18:15:55 +0000

Nang ngarannya anak nang disayangi banar ulih kuitan, Kacil mambahanu pina nyaman banar batatagih. Haji Ipul wan bini sidin gin pina kada tapi bahitung maungahakan anak. Urusan maungahakan anak nangini bahanu banyak luputnya pada kananya. Wih nang kaya pas manukarakan Kacik komputer, mun gasan kabaikan kikira pas haja pang.

Sabuting haja pasan Haji Ipul pas manukarakan Kacil komputer sumalam, "jangan dipakai gasan balilihat gambar wan pilim nang kada-kada nak'lah", ujar sidin. Lamah tu pang gulu si Kacil maunggut, nang ngarannya lagi bakahandak. Bujur haja pang Haji Ipul kada pinandu lawan Maria Ozawa atawa Miyabi nitu, tapi sidin tahu haja, mun komputer kawa dipakai gasan macam-macam.

Nang kaya pas manukar sapida mutur hanyar dahulu, Kacil wayah ini siang malam jua balajar maudak komputer. Supaya hancap bisa jarnya,. Bujur jua pang. Kacil balajar saurangan, sambil mambaca buku komputer nang ditukarnya pas tulak ka Banjar salalu nukar komputer sumalam.

Litak lituk suara keyboard Kacil, kada siang kada malam. Bahanu balajar saurangan, bahanu dikawani Imuk kawannya.

Kanapakah hari itu Kacil pina mandam. Sakali basuara manyanyarik saurangan, kada saapa bapadah lawan nang kuitan.

"Bah, kita bulikakan haja komputer nang ditukar sumalam!"

"kanapa Nak, rusak kah sudah?"

"tahu'am. Satahu ulun ada nang kada pas, kada langkap. Tuhuk sudah ulun mancarii dimana andakannya tatap haja kadada", jar Kacil manjalasakan wan kuitan.

Asa himung Haji Ipul, mandangar anaknya mulai paham. Jar sidin mun tahu ada nang rusak nitu artinya sasar bapaham, bapintar. Mintu jua Kacil nang bahanu pina ngalih banar paham. Limbah bahimat balajar ada jua tataran upih.

"ayuai nak'ai. Kaina kita bulikakan mun rusak tu", jar sidin wan Kacil, "buati ai ka kutaknya pulang barataan".

"kada usah barataan bah ai. Keyboard-nya haja. Inya nitu haja nang kada langkap" jar Kacil manyahuti.

Maginnya himung kuitan Kacil mandangar Kacil kawa manjalasakan nang mana nang rusak, lalu bamagin ai sidin handak tahu.

"nangapa rusaknya garang?" ujar sidin manakuni Kacil.

"keyboardnya nitu kada langkap Bah ai. Ulun tuhuk maitihi tunggal bigian picikannya, sakalinya ada nang kadada. Bubuhan hurup wan angka ada barataan, picikan enter, delete, samuaan ada" jar Kacil mulai mamadahakan.

"tapi parahatan ulun di suruh mamicik Any Key, inya parintahnya nitu biasanya batulisan Press Any Key to Continue Bah'ai. Nitu artinya picik Any Key mun handak manarusakan. Nah, picikan Any Key ini nang tuhuk ulun cari'i di keyboard nitu, ya itu ulun kada tatamu jua. Nyata banar sudah kita dijualinya keyboard nang kada langkap" jar Kacil.

"uuu… mintukah…"